Маладыя беларусы выставілі ў Варшаве “кантэкст Лукашэнкі”

Наведніца выставы: “Рэбус, загадка, таямніца,
цікаўнасць…”

Менавіта пра такія асацыяцыі, выкліканыя
мастацкімі творамі, гаворыць большасць наведвальнікаў выставы пад назвай “Па
той бок мяжы”, якая адбываецца гэтымі днямі ў Варшаве. Гэтыя словы тычацца і
твораў маладых мастакоў з Беларусі – удзельнікі стыпендыяльнай праграмы Міністэрства
культуры Польшчы “Gaude Polonia”.

Супрацоўнікі кнігарні “Traffic Club”, у якой
праходзіць выстава, кажуць, што жадаючых паглядзець на карціны мастакоў з-за
ўсходняй мяжы не вельмі багата. Аднак тыя, што прыходзяць – сапраўдныя аматары
сучаснага выяўленчага мастацтва.

Дзяўчына: “Я ўвогуле захапляюся мастацтвам, таму, калі
пачула пра гэтую выставу, зацікавілася. Карціны мне вельмі падабаюцца, толькі
амаль што ва ўсіх працах дамінуюць цёмныя колеры. Таму выстава ўвогуле здаецца
крыху пісемістычнай”.


Хлопец: “Для мяне вельмі важна, што тут я магу пабыць
сам-насам з працамі маладых мастакоў з Беларусі і Украіны, пашукаць у іх нешта
адметнае. Так, у карцінах беларусаў абавязкова прысутнічае кантэкст Лукашэнкі.
Мастак – асоба, якая любіць і цэніць свабоду, ён не жыве ў вакууме. І можа
палітычны кантэкст тут не на паверхні, але ў працах ён вельмі істотны”.

Кабета: “Карціна “Зіма”, ля якой мы зараз знаходзімся, на
мой погляд, найпрыгажэйшая. Рэшта карцін на мяне не аказала нейкага пазітыўнага
дзеяння. Але ж яны вызываюць шмат асацыяцый. Напрыклад, вось тыя творы
асацыююцца ў мяне з мапай горада, а тая графіка са старымі папірусамі”.

Праца мастачкі з Украіны Кацярыны Касьяненка пад назвай
“Зіма” сапраўды заварожвала наведвальнікаў выставы сваімі халоднымі колерамі. Але
не меншай папулярнасцю ў іх карысталася серыя працаў беларускі Валянціны
Калеснікавай
“Партрэт натуры”. Па словах аўтаркі, праца сімвалізуе еднасць
чалавека і прыроды і была створана выключна з натуральных матэрыялаў.

Валянціна Калеснікава: “Серыя складаецца з чатырох карцінаў
і выканана ў тэхніцы “чарпанай паперы”. Аздоблена праца рознымі відамі траў.
Выконвала я яе ў майстэрні знакамітай у Польшчы мастачкі Малгажаты
Бучэк-Следзінскай”.


Узяць удзел у стыпендыяльнай праграме “Gaude Polonia”могуць
не толькі майстры выяўленчага мастацтва. Сярод стыпендыстаў перакладчыкі,
мастацкія крытыкі, гісторыкі. Так, Яўген Шымановіч з Мінска – музыка. Выпускнік
Беларускай Акадэміі музыкі грае на кларнэце і ў гэтым годзе таксама вырашыў
паўдзельнічаць у праграме.

Яўген Шымановіч: “Я ў гэтым годзе атрымаў стыпендыю “Gaude
Polonia” і цягам шасці месяцаў спрабую рэалізоўваць свой праект у Польшчы.
Вывучаў сучасную польскую музыку і тэхніку ігры на кларнэце. Але найбольш
карысным лічу тое, што пазнаёміўся з новымі цікавымі людзьмі. Кожны мае
магчымасць нават некалькі разоў падаць дакументы на гэтую стыпендыю, і калі Міністэрства
культуры Польшчы палічыць ягоны праект перспектыўным, яго таксама на паўгады
сюды запросяць”.

Пакуль Яўген жыў у Варшаве, яго рэпертуар папоўніўся
польскімі песнямі. Музыка марыць зайграць іх для беларускай публікі. А яшчэ
беларускія стыпендысты вераць, што менавіта культура і мастацтва паспрыяюць
знікненню межаў паміж Беларуссю і Еўропай. Межаў як канкрэтных, так і ўмоўных. Бо
мастацтва межаў не мае!