Генпракуратура накіравала ў суд справу "МММ-2011"
25 красавіка Генеральная пракуратура накіравала ў Вярхоўны суд крымінальную справу "фінансавай піраміды МММ-2011". У якасці абвінавачаных праходзяць 13 чалавек.
"Мы ў Вярхоўны суд накіравалі для вызначэння падсуднасці, яны ўжо будуць у які-небудзь суд накіроўваць для разгляду", — паведамляюць карэспандэнту Еўрарадыё ў Генпракуратуры.
Удзельнікаў "МММ-2011" вінавацяць у прадпрымальніцкай дзейнасці без дзяржаўнай рэгістрацыі, звязанай з атрыманнем прыбытку ў асабліва буйным памеры.
Генпракуратура таксама падала пазоў да абвінавачаных для кампенсацыі даходу ад нелегальнай дзейнасці ў памеры 4,5 мільярдаў рублёў.
Дарэчы, апошнім часам толькі два чалавекі, затрыманыя па "справе МММ-2011", знаходзіліся пад арыштам.
