Эксперты: бомба для тэракту 3 ліпеня 2008 года была выраблена не ў Віцебску
Сёння ў судзе па справе аб тэракце ў метро абнародавалі высновы расійскіх экспертаў, якія даследавалі бомбу, знойдзеную ў Мінску ў 2008 годзе.
Як вядома, тады на Дзень незалежнасці 3 ліпеня магло адбыцца два выбухі, другая бомба проста не спрацавала. На думку расійскіх экспертаў, гэтае прыстасаванне выраблялі не ў Віцебску. Спецыялісты знайшлі на кампанентах бомбы пыльцавое зерне шэрагу раслінаў, якіх няма ў гэтым рэгіёне. Бомбу маглі зрабіць у заходняй частцы Бранскай вобласці, у Калінінградскай вобласці, у паўднёва-усходняй частцы Беларусі, паўночна-заходняй частцы Украіны. Таксама месцам вырабу магла стаць паўночна-усходняя частка Польшчы ці Латвія і Літва.
Рыхтаваць бомбу маглі ў гарадскім умовах, напрыклад, блізу Батанічнага сада. Часам вытворчасці кампанентаў эксперты лічаць травень або чэрвень, інфармуе БелаПАН.
