Дзяніс Турчаняк працягвае змаганне за культурную каштоўнасць Брэста
Сёння суд Ленінскага раёна Брэста разгледзеў справу гарадскога каардынатара Руху "За Свабоду" супраць намесніка старшыні Брэсцкага гарвыканкаму.
Нагадаем, што Дзяніс Турчаняк вырашыў знайсці ўласніка будынку, які мае статус гісторыка-культурнай каштоўнасці, але знаходзіцца ў паўразбураным стане. Па адпаведную інфармацыю ён звярнуўся ў Брэсцкі гарвыканкам. Але на яго запыт кіраўніцтва горада адказала адмовай. Са словаў дэмакратычнага актывіста, такім чынам намеснік старшыні Брэсцкага гарвыканкама Вячаслаў Хафізаў перашкодзіў яму рэалізаваць абавязкі перад краінай "ахоўваць гісторыка-культурную, духоўную спадчыну і іншыя нацыянальныя каштоўнасці", прадугледжаныя Канстытуцыяй.
Разгляд скаргі Турчаняка зацягнуўся на некалькі гадзін. Довады заяўніка былі замацаваныя юрыдычна, ён спасылаўся на заканадаўства. Прынцыповая, але ж не зусім зразумелая пазіцыя гарвыканкаму вадзіла справу па замкнёным коле.
Турчаняк: "З выступу прадстаўніка гарвыканкаму, кіраўніка юрыдычнага аддзелу, можна зрабіць наступныя высновы: для таго, каб запрасіць рашэнні, я павінен патлумачыць, як гэтымі рашэннямі былі парушаныя мае правы. Але ж, не ведаючы, аб чым гэтыя рашэнні, я не магу растлумачыць гэтага".
Канчатковае рашэнне па дадзенай справе суд абвесціць 5 студзеня.