Беларусь асудзіла ядзернае выпрабаванне ў Паўночнай Карэі
12 лютага Карэйская Народная Дэмакратычная Рэспубліка правяла чарговае, трэцяе па ліку, ядзернае выпрабаванне.
Беларускі бок рашуча асудзіў гэтую акцыю, заяўляе Міністэрства замежных справаў. У заяве гаворыцца, што Паўночная Карэя парушыла цэлы шэраг рэзалюцый Савета Бяспекі ААН, у тым ліку нядаўнюю рэзалюцыю 2087, прынятую сёлета. "Гэтае дзеянне з боку КНДР уяўляе сабою сур'ёзную пагрозу для свету і бяспекі ў рэгіёне Паўночна-Усходняй Азіі і за яго межамі", — гаворыцца ў заяве, якую цытуе БЕЛТА.
Беларусь прапанавала Паўночнай Карэі неадкладна вярнуцца ў прававое поле і забяспечыць выкананне Дамовы пра нераспаўсюджанне ядзернай зброі і адпаведных рашэнняў Рады Бяспекі ААН. Таксама КНДР было прапанавана далучыцца да Дамовы пра ўсёабдымную забарону ядзерных выпрабаванняў.
Фота — ctv.by