Андрэй Курэйчык стаў лаўрэатам "Русафоніі-2012"
Драматург прывёз у Парыж сваё "Неба" і распавёў пра асаблівасці айчыннай літаратуры.
Беларускі драматург і пісьменнік Андрэй Курэйчык атрымаў прэстыжную літаратурную перакладчыцкую прэмію “Русафонія-2012”. Цырымонія ўручэння прэміі прайшла ў Парыжы падчас буйнога фестывалю рускамоўнай літаратуры і мастацтва “Русенко”. Галоўнай мэтай штогадовага фестывалю з’яўляецца дэманстрацыя французскай публіцы дасягненняў сучаснай рускай літаратуры, тэндэнцый яе развіцця і модных пісьменнікаў, незалежна ад іх пражывання. Па словах Курэйчыка, за кошт гістарычных абставін ён піша па-руску, аднак лічыць сябе беларускім аўтарам. На фэсце драматург распавёў “пра беларускае культурнае і сацыяльнае поле і тэндэнцыі развіцця менавіта айчыннай культуры”. Усе запрошаныя аўтары, сярод якіх запатрабаваныя Ўладзімір Сарокін, Захар Прылепін, Людміла Ўліцкая прывезлі ў Парыж свае кнігі, перакладзеныя на французскую мову. Курэчык прадставіў на фэсце сваю п’есу “Неба”, перакладзеную на французскую ў 2010 годзе Ларысай Гіймэ.
