Андэрс Брэйвік паскардзіўся на халодную каву ў турме
Адпаведны ліст ён накіраваў ва ўпраўленне папраўчых установаў Нарвегіі.
Умовы свайго ўтрымання ён называе ў лісце "негуманнымі". У прыватнасці, Брэйвік незадаволены тым, што каву яму падаюць халоднай, кладуць мала масла на хлеб, а таксама не дазваляюць карыстацца крэмам для ўвільгатнення скуры, перадае ВВС.
Ліст Брэйвіка напісаны на 27 старонках. Сярод іншых скаргаў — занадта халодная камера, у якой ён змушаны апранаць на сябе тры слаі вопраткі, а таксама занадта цвёрдыя наручнікі, якія муляюць яму ў запясцях падчас прагулкі.
Дарэчы, тэрарыст адбывае пакаранне ў спецыяльна для яго падрыхтаванай трохпакаёвай камеры ў турме Іла. Камера складаецца са спальні, кабінета і пакоя для фізічных практыкаванняў. Акрамя таго, у ёй ёсць кампутар з офлайн-доступам да электроннага даведніка "Вікіпедыя".
Нагадаем, што "нарвежскі стралок" асуджаны на 21 год за забойства 77 чалавек. Аднак тэрмін зняволення яму могуць падаўжаць, калі палічаць асуджанага небяспечным для грамадства.
Фота — kp.ru
