Дабрачынная акцыя з 10 тысяч школьнікаў збірае ў школу толькі дзвесце

120806 Savicz Pershaklaszka.mp3

У невялікім кошыку ў аддзеле канцтавараў на другім паверсе ГУМа ляжаць сшыткі, лінейкі, вокладкі.

“Гэта акцыю праводзіць Мінгарвыканкам, не ГУМ праводзіць, - кажуць супрацоўнікі крамы. - Яны ўвечары прыходзяць, забіраюць рэчы. Можна прыносіць любыя! Ніхто ніякі кастынг не праводзіць”.

Прыносіць любыя рэчы можна для шматдзетных сямей “Партфель першакласніка” і ў ЦУМе. І прадаўцы гандлёвага дома “На Нямізе” даволі спакойна рэагуюць на маё імкненне, нешта пакласці ў кошык, ніяк не рэагуюць, што рэчы купленыя не ў краме.

“Можна ўсе прыносіць”, - кідае дзяўчына-прадавец.

А вось у даведцы гандлёвага дома “На Нямізе” Еўрарадыё катэгарычна заяўляюць: толькі рэчы, якія не былі ва ўжыванні:

“Вось калі ў вас ёсць партфель, дзіця яго крыху насіла, то такія рэчы ўжо нельга прыносіць. Толькі новыя рэчы”.

Складаю толькі што купленыя сшыткі ў дабрачынны кошык і я. Хоць прадаўцы і папярэджваюць, што мае сшыткі не тыя - першакласнікам патрэбныя ў буйную клетку, а я купіла звычайныя.

“У гандлёвым доме не так зразумелі! Можна прыносіць любыя рэчы. Ёсць жа разнастайныя гурткі”, - заўважае пра рэчы, былыя ва ўжыванні, галоўны спецыяліст аддзела адраснай дапамогі Упраўлення сацыяльнай падтрымкі насельніцтва камітэта па працы Мінгарвыканкама Вольга Калядка.

Але і чыноўнік заўважае, што лепш бы новыя рэчы.

“Першакласніку будзе крыўдна, калі ў яго будуць нейкія ужо былыя ва ўжыванні рэчы”, - кажа Вольга Калядка.

Але, як даведалася Еўрарадыё, дапамогу атрымаюць толькі тыя дзеткі, чые бацькі ўваходзяць у Беларускую асацыяцыю шматдзетных бацькоў. Такіх дзяцей ў Мінску – трохі больш за дзве сотні. Плюс тыя, каго парэкамендуе Камітэт адукацыі. Апошнія атрымаюць дапамогу, калі грамадскасць добра адгукнецца.

“Нам з Пінска тэлефанавалі, калі пачулі пра акцыю! Але пры чым да Мінска Пінск. Хай яны сваю гарадскую акцыю арганізуюць. Мы ж грамадскае аб’яднанне і не маем падтрымкі дзяржавы, усё самі”, - кажа старшыя Беларускай асацыяцыя шматдзетных бацькоў Таццяна Краўчанка.

Каб трапіць у Асацыяцыю трэба прайсці абследаванне і атрымаць даведку аб складзе сям’і, а таксама штогод... плаціць узнос: 300 тысяч рублёў.

Астатнім сем’ям дапаможа горад. Штогод шматдзетным бацькам выдаткоўваецца матэрыяльная дапамога ў памеры 30% ад бюджэту пражытачнага мінімуму. 253 000 рублёў на кожнага школьніка.