Рэдактар "Брестской газеты" папрасіў чытачоў адмовіцца ад падпіскі на 2021 год

Галоўны рэдактар "Брестской газеты" Віктар Марчык звярнуўся да чытачоў з незвычайнай просьбай. Ён папрасіў іх адмовіцца ад падпіскі на наступны, 2021 год. А калі падпісаліся — ануляваць падпіску.

"Справа ў тым, што ва ўмовах, у якія сёння спрабуюць паставіць наша выданне, мы не ўпэўненыя, што зможам выканаць свае абавязанні перад вамі", — піша Марчык. І прызнаецца, што не мае ўпэўненасці ў друкарні ды пошце. 

Са студзеня газета не зможа друкавацца ў "Брэсцкай друкарні", бо яе кіраўніцтва вырашыла не падаўжаць дамову з газетай. "Брестская газета" шукае магчымасці для друку, але тут ёсць вялікая праблема: ліцэнзію на друкаванне газет маюць амаль толькі адны дзяржаўныя друкарні. "А, як паказвае сітуацыя з "БГ" і шэрагам іншых друкаваных выданняў, у гэтай сферы законы эканомікі, рынку, дый проста здаровы сэнс не заўсёды працуюць належным чынам. Такія асаблівасці цяперашніх беларускіх рэалій", — канстатуе галоўрэд.

Па яго словах, друкарня ў аднабаковым парадку перанесла пачатак друку газеты з 9:00 па чацвяргах на 15:00. А паводле дамовы з "Белпоштай" наклад газеты трэба здаць ім не пазней за 15:00. 

"Але як мы можам здаць наклад газеты ва ўчастак у абумоўлены ў дамове час, калі чарговы нумар у 15:00 толькі пачынаюць друкаваць у друкарні? Вельмі відавочная часавая нестыкоўка (або стыкоўка) атрымалася, каб быць выпадковасцю. Падпісваць з рэдакцыяй дадатковае пагадненне да дзеючага дагавора, якое прадугледжвае перанос здачы накладу на больш позні час, кіраўніцтва Брэсцкага філіяла "Белпошты" адмовілася", — дзеліцца Марчык падрабязнасцямі.

Па яго словах, 2020 год усё ж удалося дапрацаваць. Аднак няма ніякіх гарантыяў, што ў 2021-м такая практыка не паўторыцца. Таму рэдакцыя вырашыла адмовіцца ад паслуг "Белпошты" па падпісцы на першае паўгоддзе 2021 года. 

Цяпер калектыў рэдакцыі шукае магчымасці альтэрнатыўнай дастаўкі выдання чытачам. "Балазе ў XXI стагоддзі ёсць даволі шырокі выбар магчымасцяў для доступу да інфармацыі. У іх ліку — падпіска на электронную ПДФ-версію "БГ". Пакуль ж не Паўночная Карэя. Хоць, падобна, рухаемся да таго", — падсумоўвае галоўрэд.

Пры гэтым ён абяцае, што ў рознічным гандлі газета будзе даступная. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.