Расійскі афіцэр пацвердзіў, што ракеты ATACMS знішчылі ці пашкодзілі верталёты
Атака на Бярдзянск / unian.net
Расійскі афіцэр на ўмовах ананімнасці расказаў novayagazeta.eu, што ў выніку ўкраінскіх ракетных удараў па акупаваным Бярдзянску параненыя некалькі пілотаў. Паводле яго слоў, у войсках з'явілася інфармацыя, што загінуў разлік супрацьпаветранай абароны, ёсць загінулыя ў ахове складоў. "Верталёты не ўсе знішчаныя, але многія пашкоджаныя. Страты значныя", — дадаў афіцэр расійскай арміі.
17 кастрычніка стала вядома, што ўначы Узброеныя сілы Украіны нанеслі ўдары па аэрадромах у акупаваных Бярдзянску і Луганску. Сцвярджалася, што былі знішчаныя верталёты (агулам — 9), спецтэхніка, боепрыпасы. Некаторыя расійскія "ваенкары" пацвердзілі буйны поспех украінскага войска, напісалі пра "адзін з самых сур'ёзных удараў" за ўвесь час вайны.
Прэзідэнт Украіны Уладзімір Зяленскі пацвердзіў, што гэта быў першы ўкраінскі ўдар ракетамі далёкага радыусу дзеяння ATACMS па пазіцыях РФ: "Дамоўленасці з прэзідэнтам Байдэнам выконваюцца. Выконваюцца вельмі трапна — "атакамсы" сябе паказалі".
