Расія просіць бензін не толькі ў Беларусі, але і ў Казахстана

Расія просіць бензін не толькі ў Беларусі, але і ў Казахстана. Як паведамляе Reuters са спасылкай на свае крыніцы, у РФ намагаюцца падрыхтавацца на выпадак дэфіцыту, які можа ўзнікнуць з-за атак ўкраінскіх беспілотнікаў на расійскія нафтаперапрацоўчыя заводы і перабояў з пастаўкамі. Таму Казахстан папрасілі быць гатовым паставіць у Расію 100 тысяч тон бензіну ў выпадку дэфіцыту. Нібыта ў гэтым пытанні ўжо дасягнутая згода.

Міністэрствы энэргетыкі Расіі і Казахстана пакуль не адказалі на просьбы Reuters аб каментары.

"Да цяперашняга часу такі запыт ад Мінэнерга РФ не паступаў. Таму інфармацыя не пацвярджаецца", — цытуе словы дарадцы міністра энергетыкі Казахстана Шынгыса Ільясава informburo.kz.

Раней паведамлялася, што Беларусь ужо пагадзілася дапамагчы РФ з пастаўкамі бензіну. Але беларуска-расійскія перамовы "ішлі складана". Відавочна, што рэжым Аляксандра Лукашэнкі гатовы дапамагчы толькі на выгадных умовах.

Пакуль жа ўлады Расіі заяўляюць, што сітуацыя на ўнутраных рынках паліва стабільная, а запасы досыць вялікія. Але вядома, што з пачатку года ўзмацнілася інтэнсіўнасць нападаў украінскіх беспілотнікаў на расійскія НПЗ і нафтабазы. Вытворчасць бензіну ў РФ ўпала, а кошты на яго пачалі расці. Найбуйнейшыя нафтавыя кампаніі РФ купляюць "сродкі процідзеяння" беспілотнікам.