Рашэнне па Расіі ў хакеі можа паўплываць на допуск Беларусі — меркаванне

03/11/2026 - 12:37

Верагодна, зусім хутка і Беларусь вернуць у сусветны хакей

Верагодна, зусім хутка і Беларусь вернуць у сусветны хакей / sport5.by

Рашэнне Спартыўнага арбітражнага суда (CAS) аб вяртанні расійскай хакейнай зборнай на сусветны лёд будзе мець наступствы. Адно з іх закране Беларусь, якую ў хуткім часе таксама цалкам вернуць на міжнародныя хакейныя турніры. Такое меркаванне ў каментары для Еўрарадыё выказаў беларускі блогер Яраслаў Пісарэнка, аўтар YouTube-канала "Частнок".

У каментары да рашэння суда гаворыцца, што расійскі бок выйграў не палітычную спрэчку аб вяртанні Расіі ў сусветны спорт, а юрыдычную спрэчку аб даказальнасці рашэння Міжнароднай федэрацыі хакея (IIHF). Як адзначаецца, федэрацыя спасылалася на пагрозы бяспецы, але не змагла пацвердзіць іх у аб'ёме, неабходным для настолькі сур'ёзнага абмежавання.

Пісарэнка адзначыў, што расіян дапусціў не IIHF, а арбітражны суд, і адбылося гэта праз фармулёўкі. Ён нагадаў, што ў той жа дзень, калі расійскіх хакеістаў вярнулі, у кёрлінгу рашэнне было адмоўным.

Блогер растлумачыў розніцу паміж двума выпадкамі. У кёрлінгу забарону абгрунтавалі тым, што ўдзел расійскай каманды можа выклікаць байкоты: адны краіны адмовяцца гуляць, іншыя не захочуць прымаць турніры. Гэта стварае праблемы для міжнароднай федэрацыі.

Пісарэнка нагадаў, што раней IIHF дапусціла да спаборніцтваў жаночую зборную Беларусі і некаторыя юнацкія каманды, але не дарослую мужчынскую. Зараз беларускі бок, як ён адзначыў, падаў апеляцыю і разлічвае трапіць на чэмпіянат свету. Калі IIHF адмовіць, застанецца мала часу, каб вырашыць пытанне праз арбітражны суд.

На думку Пісарэнкі, рашэнне будзе на карысць Беларусі, паколькі прэцэдэнты ўжо ёсць.

"Беларусь проста пойдзе па пратаптанай дарозе", — сказаў ён.

Блогер упэўнены, што беларускую каманду вернуць.

"Вельмі смешна ўявіць, што агрэсара вярнулі на спаборніцтвы, а саагрэсара — не", — заявіў ён.

Ці азначаюць апошнія падзеі вакол вяртання ў сусветны спорт Расіі і Беларусі, што і далей будуць здымацца баны і абмежаванні, напрыклад, у футболе?

Пісарэнка лічыць, што сітуацыя вакол Беларусі мяняецца. Хакей, па яго словах, больш прыкметны індыкатар, паколькі гэта папулярны від спорту. Ён чакае, што змены працягнуцца, але не радыкальныя.

Рэакцыі іншых арганізацый, напрыклад, ФІФА, блогер пакуль не чакае. Не чакае ён і дазволу беларускім зборным гуляць у Беларусі. Па яго словах, асноўная прычына ў цэлым праз адсутнасць авіязносін з большасцю дзяржаў.

Калі санкцыі з "Белавіі" здымуць, неба адкрыюць і самалёты змогуць лётаць з Еўропы, размова можа пачацца, адзначыў Пісарэнка.

Ён таксама дапускае, што пры паступовым аслабленні забарон, санкцый і ціску на розныя структуры спрацуе прынцып ланцуговай рэакцыі: усе глядзяць на суседзяў і пачынаюць дзейнічаць. Па словах блогера, сітуацыя ўжо мяняецца і, хутчэй за ўсё, працягне мяняцца.