Пяцярых беларусаў затрымалі за жаданне трапіць у полк Каліноўскага
![КДБ / Еўрарадыё](/sites/default/files/styles/main_image_watermark_/public/2023-08/kdb-2405.jpg.webp?itok=-avG6X_T)
КДБ / Еўрарадыё
Пяцярых беларусаў затрымалі за рэгістрацыю ў чат-боце палка Каліноўскага, паведамляе тэлеканал СТБ. Гэта 25-гадовы Аляксандр Беляеўскі з Магілёўскай вобласці, мінчук Юрый Палітыка, 29-гадовы Аляксей Калібаба, Уладзіслаў Даўетас і жодзінец Яўген Уладзіміраў.
Сюжэт пра іх затрыманне выйшаў у праграме Рыгора Азаронка "Таемныя спружыны палітыкі". Ён, дарэчы, паведаміў, што затрыманне ўсіх пяцярых адбывалася "брутальна, калі заўгодна — жорстка".
Намеснік начальніка следчага ўпраўлення КДБ Канстанцін Бычак паведаміў, што цяпер усіх затрыманых правяраюць на супрацу з замежнымі спецслужбамі.
Хутчэй за ўсё, маладыя людзі зарэгістраваліся не ў сапраўдным чат-боце палка Каліноўскага, а ў фэйкавым, створаным спецслужбамі. Улады ствараюць такія фальшыўкі не толькі для палка Каліноўскага, але і для плана "Перамога".
Полк Каліноўскага аб'ядноўвае беларусаў, якія ваююць на баку Украіны супраць Расіі. Напрыканцы верасня МУС Беларусі прызнала полк "экстрэмісцкім фармаваннем".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.