Прэзідэнт Польшчы ўшанаваў памяць забітых у 1946-м у Заляшанах беларусаў

7 чэрвеня прэзідэнт Польшчы Анджэй Дуда ўшанаваў памяць забітых у 1946-м у Заляшанах на Падляшшы беларусаў. Яны сталі ахвярамі ўзброенага польскага антыкамуністычнага фармавання "Бурага". Дуда ўсклаў вянок і памаліўся каля крыжа памяці аб загінулых. "Месца, якое адзначанае пакутамі і смерцю беларусаў, якія жылі ў Рэчы Паспалітай, нявінных жанчын і дзяцей", — сказаў польскі прэзідэнт. Разам з ім прыехаў у Заляшаны кіраўнік Польскай праваслаўнай царквы мітрапаліт Сава.

Анджэй Дуда наведаў беларускі ліцэй ў Бельску Падляскім, сустрэўся з прадстаўнікамі беларускай меншасці ў Польшчы. Ён падкрэсліў, што няма сумненняў у тым, што палякі і беларусы, нягледзячы на ​​розніцы, ствараюць адзіную супольнасць.

"На жаль, ладзіцца шмат акцыяў, якія скіраваныя на тое, каб пасварыць нашыя грамадствы, — казаў прэзідэнт Польшчы. — Каб перасварыць нашыя народы, але я хачу, каб мы не дапусцілі гэтага...".