Прайшоў першы пікет супраць "закона аб адтэрміноўках"
![Прайшоў першы пікет супраць "закона аб адтэрміноўках"](/sites/default/files/styles/gallery_main/public/2023-08/544b300a-d5c9-43f9-9730-37c0fed61101_w1023_r0_s.jpg.webp?itok=ftlshvt4)
Прайшоў першы пікет супраць "закона аб адтэрміноўках". Узгодненая з уладамі акцыя адбылася ў Тучынскім скверы ў Мінску з удзелам некалькіх маладых людзей, інфармуе ProtestBY. Плануюцца і іншыя падобныя пікеты, а таксама і масавая акцыя, узгодненая з уладамі.
Акцыя пачалася з таго, што на пляцоўцы з'явіўся хлопец у мантыі і капелюшы магістра. Ён зняў гэтае адзенне і паклаў пад плакатам "Тут мог быць магістрант, але яму не далі адтэрміноўку".
Хлопцы трымалі ў руках розныя плакаты. Адзін з іх: "Служыць, служыць і служыць" — відавочная адсылка да таго, што цяперашні міністр адукацыі Ігар Карпенка па сваіх перакананнях з'яўляецца камуністам.
На 10-й хвіліне да ўдзельнікаў пікету далучылася дзяўчына. "Так атрымалася, што ў нас у дзяржаве — традыцыйныя каштоўнасці. Гэта значыць, што жанчына не можа атрымліваць адукацыю, таму што ёй трэба нараджаць дзяцей. А цяпер мы атрымліваем сітуацыю, калі гэтыя традыцыйныя каштоўнасці распаўсюджваюцца і на мужчын. Яны не могуць атрымліваць адукацыю, бо мусяць ісці служыць у войску, — сказала яна. — Так не развіваецца сучасная дзяржава. Ці мусіць у сучаснай дзяржаве быць неадукаванае насельніцтва? Ці можа сучасная дзяржава расці фінансава і ў маральным плане, калі ніхто не можа вучыцца?"
Закон "Аб змяненні законаў па пытаннях эфектыўнага функцыянавання ваеннай арганізацыі дзяржавы" пачаў дзейнічаць у Беларусі з 10 жніўня. Як вядома, цяпер адтэрміноўку для атрымання адукацыі можна будзе атрымаць толькі адзін раз.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.