Праваслаўныя адзначаюць Вербную нядзелю
Праваслаўныя вернікі сёння адзначаюць Вербную нядзелю. Гэтае свята папярэднічае Уваскрэсенню Хрыстоваму і служыць напамінам пра трыумфальны уваход Збаўцы ў Іерусалім.
Паводле Евангелля, жыхары горада віталі Ісуса Хрыста пальмавымі галінкамі на знак пашаны і прызнання ўлады. У хрысціянскіх краінах з халодным кліматам пальмавыя галінкі часам замяняліся на вярбу, таму ў прастамоўі гэтае свята стала называцца Вербнай нядзеляй або Вербніцай.
Гэтае свята сімвалізуе прызнанне Хрыста месіяй. Роўна праз тыдзень пасля Вербнай нядзелі адзначаецца Пасха.
У Вербную нядзелю вернікі прыносяць у храм галінкі вярбы, якія там асвячаюць. Існуе звычай захоўваць асвячоную вярбу цягам года і ўпрыгожваць ёй абразы.
