Праграміст асуджаны на 4 гады калоніі за барыкады 10 жніўня на "Пушкінскай"
![Праграміст асуджаны на 4 гады калоніі за барыкады 10 жніўня на "Пушкінскай"](/sites/default/files/styles/gallery_main/public/2023-08/kononovich_sud_viasna.jpg.webp?itok=TebtQP7B)
24-гадовы праграміст Раман Канановіч асуджаны на 4 гады калоніі ўзмоцненага рэжыму за "ўдзел у масавых беспарадках" (ч. 2 арт. 293 КК). Ён знаходзіцца за кратамі з 16 кастрычніка 2020-га і ўжо прызнаны палітзняволеным.
Як паведамляе spring96.org, суд Ленінскага раёна (суддзя — Таццяна Шоцік) прызнаў Канановіча вінаватым ва ўзвядзенні барыкадаў з дапамогай жалезнай агароджы ў ноч з 10 на 11 жніўня каля станцыі метро "Пушкінская" ў Мінску. Асноўны доказ — адзін здымак з тэлефона маладога чалавека. Віну палітвязень не прызнаў.
Праваабаронцы звяртаюць увагу, што на судовае следства спатрэбілася толькі 2,5 гадзіны, на спрэчкі — 30 хвілін, а на падрыхтоўку прысуду — 2 гадзіны адразу пасля спрэчак.
Суддзя вынесла вызначэнне, каб пра прысуд і пакаранне Рамана Канановіча было паведамлена ў арганізацыю, дзе ён працаваў праграмістам да затрымання. Навошта? Каб супрацоўнікі гэтай фірмы не ўдзельнічалі ў "масавых беспарадках"!
Як вядома, 10 жніўня каля "Пушкінскай" быў забіты пратэстовец Аляксандр Тарайкоўскі. Забойцы дагэтуль не пакараныя. А вось тых, хто будаваў барыкады, адпраўляюць у калоніі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.