Польская паліцыя затрымала мікрааўтобус з нелегальнымі мігрантамі

Польскія паліцыянты затрымалі ў чацвер 22 нелегальных мігранты, якія перасоўваліся па тэрыторыі Сувалкскага павета краіны на мікрааўтобусе, паведамляе мясцовы аддзел паліцыі.

Мікрааўтобус Renault з нямецкімі нумарнымі знакамі ехаў ад літоўскай мяжы ў бок горада Сувалкі. Транспартны сродак быў спынены на блокпосце для праверкі. Кіраваў машынай 34-гадовы грамадзянін Сірыі, акрамя яго ў аўтобусе знаходзіліся яшчэ 20 сірыйскіх грамадзян і адзін грамадзянін Емена.

Кіроўца аўтобуса і пасажыры былі затрыманыя, паколькі знаходзіліся на тэрыторыі Польшчы незаконна.

Як паведамляла Еўрарадыё, за сераду, 17 лістапада, польскія памежнікі прадухілілі 501 спробу незаконнага перасячэння мяжы на ўчастку з Беларуссю.