Польшча патрабуе склікаць саміт ЕС з нагоды бойні ў Бучы
![Польшча патрабуе склікаць саміт ЕС з нагоды бойні ў Бучы](/sites/default/files/styles/gallery_main/public/2023-08/2020-07-12t212713z_2068054785_rc2xrh960wt1_rtrmadp_3_poland-election.jpg.webp?itok=S9XCf-oJ)
Злачынствы супраць мірнага насельніцтва ў Бучы сведчаць, што нельга шукаць з Расіяй кампраміс любой цаной. Пра гэта напісаў у Фэйсбуку польскі прэзідэнт Анджэй Дуда.
"Насамрэч, абаронцам Украіны патрэбныя перадусім тры рэчы: зброя, зброя і зноў зброя", — канстатаваў ён. Па словах Дуды, злачынцаў трэба называць злачынцамі, прыцягваць да адказнасці і асуджаць.
Прэм’ер-міністр Польшчы Матэвуш Маравецкі лічыць неабходным неадкладна склікаць саміт Еўрасаюза па ваенных злачынствах Расіі ва Украіне і ўвядзенні новых санкцый супраць Расіі.
"Бучанская бойня — гэта больш, чым трывожны званок для Еўропы і свету. Гэта страшны крык аб справядлівасці, свабодзе і праве на жыццё. Аб асноўных і агульначалавечых каштоўнасцях. ЕС павінен канфіскаваць усе расійскія актывы ў заходніх банках, а таксама актывы расійскіх алігархаў. ЕС павінен неадкладна разарваць усе гандлёвыя адносіны з Расіяй. Еўрапейскія грошы павінны перастаць паступаць у Крэмль. Адно трэба ўвесці супраць злачыннага і ўсё больш таталітарнага рэжыму Пуціна — эфектыўныя санкцыі", — напісаў Маравецкі.
Ён таксама лічыць, што Украіне трэба даць больш зброі для абароны.
У Бучы, вызваленай ад расійскіх войскаў знайшлі не менш за 300 забітых грамадзянскіх асобаў. Многія з іх былі закатаваныя. Фотаздымкі з Бучы шакавалі свет.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.