Пасля вяртання з Украіны Эрдаган даведаўся, што заразіўся омікронам

Прэзідэнт Турцыі Рэджэп Таіп Эрдаган заразіўся штамам каранавіруса "омікрон". "Вынік нашага тэсту на COVID-19, які мы з жонкай зрабілі пасля лёгкіх сімптомаў, апынуўся станоўчым", — напісаў ён у Twitter. Эрдаган часова будзе працаваць дома.

Днямі Рэджэп Таіп Эрдаган з жонкай пабываў з візітам ва Украіне. Ён правёў перамовы з украінскім прэзідэнтам Уладзімірам Зяленскім. Перад візітам Эрдагана кіраўнік Офіса прэзідэнта Украіны Андрэй Ярмак заявіў, што заразіўся каранавірусам. Зяленскі пра праблемы са здароўем не паведамляе.