Пасля 15 сутак выйшаў на волю фатограф "Новага Часу" Дзмітрый Дзмітрыеў
Зранку 20 жніўня з турмы на Акрэсціна выйшаў фатограф газеты "Новы Час" Дзмітрый Дзмітрыеў, перадае Радыё "Свабода".
Як распавядала Еўрарадыё, мужчыну затрымалі 5 жніўня. У 6:40 раніцы ён паспеў напісаць у сацсетках, што да яго прыйшлі. Пасля гэтага Дзмітрыева адвезлі на на допыт у Следчы камітэт, ператрус у яго кватэры не праводзіўся.
Паведамлялася, што ў сілавікоў, якія затрымалі фатографа, быў спіс людзей, па якіх у той дзень павінны былі прыйсці.
Суд прызначыў Дзмітрыеву 15 сутак арышту, абвінаваціўшы ў непадпарадкаванні міліцыі. Пры гэтым сваякі кажуць, што ён пайшоў з міліцыянтамі па першым жа іх патрабаванні.
Раней Дзмітрыеў працаваў у міліцыі. У 2020-м яго неаднаразова затрымлівалі падчас працы фотакарэспандэнтам на акцыях пратэсту. Дарэчы, на пачатку жніўня мінулага года ён трапіў у часовы лагер для затрыманых пад Слуцкам на месцы лекава-працоўнага прафілакторыя.
