Папа Францішак згадаў Беларусь і памаліўся перад абразом Жыровіцкай Божай Маці

Папа Францішак маліўся перад абразом Маці Божай Жыровіцкай / vaticannews.va
Папа Францішак маліўся перад абразом Маці Божай Жыровіцкай / vaticannews.va

11 студзеня папа Францішак некалькі хвілін правёў у малітве за мір ва Украіне перад копіяй абраза Маці Божай Жыровіцкай. Падчас агульнай аўдыенцыі яна была выстаўленая ў ватыканскай Зале Паўла VI, перадае беларуская рэдакцыя інтэрнэт-парталу Vatican News.

Пры гэтым пантыфік згадаў Беларусь.

"Не будзем забываць пра змучаную Украіну, якая заўсёды ў нашых сэрцах; выкажам гэтаму народу, які перажывае жорсткія пакуты, нашую любоў, нашую блізкасць і нашую малітву.

А зараз я правяду некалькі хвілін у цішыні, молячыся за гэтую дарагую краіну і за мір, перад іконай Багародзіцы народа, якая ўшаноўваецца ў Беларусі. Запрашаю вас духоўна далучыцца да маёй малітвы", — сказаў ён.

Абраз Маці Божай Жыровіцкай беларускія грэка-католікі ўшаноўваюць як Валадарку беларускага народа. Ушаноўваюць гэты абраз і ўкраінскія вернікі. Копія абраза ў выглядзе фрэскі размяшчаецца ў рымскім касцёле святога Сяргея і Вакха, катэдральным саборы Апостальскага экзархата для ўкраінскіх грэка-католікаў у Італіі.

Папярэдні раз папа Францішак казаў пра Беларусь у лістападзе 2021-га, згадваючы пра міграцыйны крызіс.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі