Памёр праваабаронца Алег Гулак. Ён узначальваў Беларускі Хельсінскі камітэт

Памёр беларускі праваабаронца, старшыня Беларускага Хельсінскага камітэту Алег Гулак. Пра гэта паведамляе на своёй старонцы ў Фэйсбук стваральнік фонду BySol Андрэй Стрыжак.

Гулак не аднойчы бываў у эфіры Еўрарадыё. Ён казаў, што Беларусь павінна стаць краінай, у якой яе грамадзянам прыемна жыць, а гэтага немагчыма дасягнуць без забеспячэння такіх базавых рэчаў, як правы чалавека, павага да меркавання кожнага, справядлівы суд і магчымасць абскардзіць любое рашэнне любога дзяржаўнага органа.

У 2016 годзе Алег Гулак атрымаў нямецка-французскую прэмію ў галіне правоў чалавека і законнасці. А на мінулым тыдні ён выказаўся з нагоды ўручэння ў Швецыі Нобелеўскай прэміі, адным з лаурэатаў якой стаў беларускі праваабаронца Алесь Бяляцкі.

У дзень уручэння прэміі, 10 снежня, адзначаўся Міжнародны дзень правоў чалавека. Гулак на сваёй старонцы ў “Фэйсбук” напісаў, што прамовы лаурэатаў былі якімі заўгодна, але не святочнымі.

“Але свята трэба набліжаць і ствараць, разам і кожнаму. Свята перамогі правоў чалавека”, — напісаў у той дзень Алег Гулак.

У 2021 годзе Алег Гулак стаў госцем праграмы Еўрарадыё “Нацыянальная ідэя”. Паслухаць яе можна тут.