Палітзняволеная журналістка Кацярына Андрэева даслала з-за кратаў шчымлівы верш

Палітзняволеная журналістка Кацярына Андрэева даслала з-за кратаў шчымлівы верш

Палітзняволеная журналістка Кацярына Андрэева даслала на волю шчымлівы верш. Яго апублікаваў у Фэйсбуку яе муж Ігар Ільяш.

Па словах Ігара, верш быў напісаны яшчэ ўзімку. "Звычайна яна просіць іх нікому не паказваць, але гэты я вырашыў усё ж апублікаваць", — дадае ён.

Над белым полем — 
               Зімовым морам
У цішыні
               І сярод турбот
Над маім шчасцем 
               І маім болем
Каторы месяц, 
               Які ўжо год
Ляціць, трымціць, 
              Нявымаўна ззяе
На чорнай коўдры 
              Родных нябёс
Мая самотная 
               І нямая
Мая адзіная 
              Зорка-лёс.
Я ёй малюся, яе
               Баюся
Яе спрабую 
               Не заўважаць.
А прыйдзе час — 
               Назаўжды спынюся
Пад зорным позіркам 
               Спачываць.
Пакуль блукаю 
              Глухою сцежкай
Дзе звер пакінуў 
              Свае сляды
Ужо не страшна, 
              Ужо не смешна
Ужо ніякай 
               Няма бяды
У тым што сціхлі 
               Навокал песні
А замест песняў — 
               Хрусцяць хрыбты.
У любым краі, 
                Дзе напрадвесні
У вакно астрогу 
                Мне ззяеш Ты.

Журналістак "Белсата" Кацярыну Андрэеву і Дар'ю Чульцову асудзілі за стрым з акцыі памяці забітага Рамана Бандарэнкі на "Плошчы Перамен". У верасні 2022-га дзяўчаты павінны былі выйсці на волю. Аднак у красавіку стала вядома, што на Андрэеву пачалі крымінальную справу па абвінавачанні ў здрадзе дзяржаве.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі