Палітвязня Сцяпана Латыпава на два гады пераводзяць на турэмны рэжым

Палітвязня Сцяпана Латыпава пераводзяць на два гады на турэмны рэжым, перадае праваабарончы цэнтр "Вясна".

Рашэнне ўзмацніць яму пакаранне прыняў 15 верасня суд Івацэвіцкага раёна. На пасяджэнні акрамя суддзі, пракуроркі і супрацоўніка папраўчай калоніі прысутнічаў прадстаўнік івацэвіцкага райвыканкама — у якасці назіральніка. Пры гэтым суд па кожным пытанні заслухоўваў ягонае меркаванне.

Латыпаў хадайнічаў, каб на працэсе ў якасці сведкаў выступілі начальнік прамысловай зоны і намеснік начальніка калоніі Свірыд, але суд у хадайніцтве адмовіў.

Паведамляецца, што адміністрацыя калоніі патрабавала перавесці Латыпава на турэмны рэжым на тры гады. Але суддзя Аляксандр Кірыловіч зменшыў гэты тэрмін. Неўзабаве палітвязня этапуюць у турму.

Сцяпан Латыпаў быў затрыманы на Плошчы Перамен у верасні 2020-га за тое, што патрабаваў у сілавікоў паказаць дакументы. Яго асудзілі на 8,5 года зняволення.

Нядаўна стала вядома, што ў ліпені на знак пратэсту супраць дзеянняў адміністрацыі калоніі №22 Латыпаў глытаў лязо і рэзаў вену на руцэ. За гэта яго пакаралі 17 суткамі ў штрафным ізалятары.
 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.