Палітвязнем прызнаны экс-сілавік, які кідаў кактэйлі Молатава ў вайсковыя аўто

Праваабаронцы прызналі палітвязнямі шэсць чалавек. Гэта Андрэй Паднябенны, Дзмітрый Нешта, Анатоль Яскевіч, Аляксандр Францкевіч, Андрэй Дзенісенка, Іван Губчык, паведамляе праваабарончы цэнтр "Вясна".

Андрэй Паднябенны асуджаны на 15 гадоў за стварэнне і адміністраванне "экстрэмісцкага" тэлеграм-канала, падпал аўтамабіля супрацоўніка Дэпартамента выканання пакаранняў МУС і прабітыя колы ў 39 тралейбусах.

Дзмітрыя Нешта асуджаны за тое, што кінуў тры "кактэйлі Молатава" ў аўтамабілі, якія належаць вайскоўцам адной з вайсковых часцей.

Анатоля Яскевіча асудзілі на 4,5 года за відэазвароты ў Tik-Tok з выкарыстаннем навіны пра крушэнне вайсковага самалёта ў Баранавічах і гібелі дваіх лётчыкаў, а таксама за абразу А. Лукашэнкі ў відэаазваротах.

Такі ж тэрмін атрымаў Аляксандр Францкевіч, якога прызналі вінаватым па шэрагу артыкулаў КК — у прыватнасці, пагроза гвалту ў дачыненні да супрацоўніка органаў унутраных спраў і яго блізкіх, публічная абраза А. Лукашэнкі, абраза прадстаўніка ўлады праз інтэрнэт, пагроза забойствам у дачыненні да суддзі ды інш.

Андрэй Дзенісенка асуджаны на 4 гады зняволення за "распальванне расавай, нацыянальнай, рэлігійнай ці іншай сацыяльнай варожасці і варажнечы" і заклікі да санкцый. 

Іван Губчык асуджаны на 4,5 года за відэаролікі ў Tik-Tok з развагамі аб прычынах жорсткасці ўладаў, заклікамі да прадстаўнікоў улады задумацца пра будучыню, заклікамі да пратэстоўцаў не ўжываць празмерны гвалт, асабліва да шараговых супрацоўнікаў сілавых ведамстваў.

На сёння ў Беларусі 1263 палітвязязні.