Вы тут

Падрыхтоўка да рэферэндуму ў Брэсце: АМАП суправадзіў актывістаў у гарвыканкам

Праціўнікі завода АКБ і АМАП / "Виртуальный Брест"

Чарговае "кармленне галубоў" у Брэсце скончылася сустрэчай праціўнікаў завода АКБ з гарадскімі ўладамі. Актывісты па традыцыі сабраліся ў нядзелю на плошчы Леніна, але іх адтуль у будынак Брэсцкага гарвыканкама "запрасілі" прайсці супрацоўнікі АМАП, паведамляе "Віртуальны Брэст".

На сустрэчы, у якой удзельнічаў кіраўнік Брэста Аляксандр Рагачук, абмяркоўвалася пытанне падрыхтоўкі да мясцовага рэферэндуму пра лёс скандальнага акумулятарнага завода. Яго правядзенне 22 чэрвеня анансаваў Аляксандр Лукашэнка, калі наведваў Брэст і сустрэўся з актывістамі.

Некаторыя з прысутных настойвалі на тым, што рэферэндум не патрэбны, так як завод, на іх думку, пабудаваны з парушэннямі. Падчас абмеркаванняў гэтак жа прагучалі патрабаванні выпусціць затрыманых блогераў Сяргея Патрухина і Аляксандра Кабанава.

У канцы сустрэчы, якая доўжылася, больш за дзве гадзіны Рагачук распавёў, што марыць, каб новыя інвестары самі вырашылі зачыніць небяспечную вытворчасць і пытанне будзе такім чынам зачынена.

Як паведамляла Еўрарадыё, 9 красавіка акумулятарны завод "АйПауэр" прайшоў дзяржаўную экалагічную экспертызу. Ужо больш за два гады гараджане змагаюцца супраць яго будаўніцтва: яны лічаць, што гэта шкодная вытворчасць, якое негатыўна адаб'ецца на экалагічнай сітуацыі.

25 траўня стала вядома, што бізнэсмэн Віктар Лемяшэўскі больш не з'яўляецца ўладальнікам скандальнага прадпрыемства. Цяпер 85% долі кампаніі належаць Сяргею Кагановічу, а 15% — Дзмітрыю Баскаву. Абодва бізнэсмэны звязаны з хакейнай камандай прэзідэнта Беларусі Аляксандра Лукашэнкі: Кагановіч адзін з гульцоў, а Баскаў — гендырэктар хакейнага клуба "Дынама-Мінск" і трэнер каманды Лукашэнкі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.