Open Space "Pressure"
Другі альбом мінскай поп-рок команды.
Музыкі перачакалі 2 гады пасля выхаду дэбютнага альбома "Deal With Silence" і запісалі цяжкавасценькую па гучанні, але лёгкую для ўспрыяцця пласцінку "Pressure". Паўза паміж дэбютным альбомам і новай пласцінкай расцягнулася на 2 гады. Тым не менш новая кружэлка ад Open Space нечаканых знаходак не ўтрымлівае. Асноўная тэма і ідэя "Pressure" – узаемаадносіны людзей ў розных жыццёвых сітуацыях. Як і належыць узросту і стылю гурта – хапае тут і гісторый кахання (I Want You To Know), і сяброўскіх драм (I Have A Dream), і нейкіх крыху за вушы прыцягнутых тэмаў з жыцця – кшталту песні пра вулічных прадаўцоў кніг (Bookseller ) . Дарэчы, менавіта на песню "Bookseller" Open Space робяць асноўную стаўку альбома і прарочаць ёй славу "Beautiful" з першага альбома. З яе і пачнем.
Самі Open Space характэрызуюць альбом як музыку актыўнага дня, якая мусіць вучыць слухачоў галоўнаму жыццёваму правілу – не здавацца і заўжды імкнуцца наперад. Як мінімум пра гэта жыццесцвярджальная песня "Let It Go".
Па агульным успрыяцці ў параўнанні з дэбютнай пласцінкай, "Pressure" значна больш моцны, дапрацаваны, дарослы. Значна палепшылася вымаўленне музыкаў. Стала больш драйвовых і дынамічных песень. Яшчэ адзін козыр новай пласцінкі – якасны гук, створаны ўкраінскім саўндпрадзюсерам Змітром Іванеем ("Океан Ельзи", "Green Grey", Ані Лорак ды інш.)
Пяшчотны гімн Do You Remeber музыкі прысвяцілі сваёй супрацы з ААН і місіі Y-peer, якую зараз гурт і прадстаўляе ў Беларусі. Як і чакаецца ад такога кшталту песень, Do You Remeber атрымалася хоць і салодкай, амаль прытарнай, але ўсё ж адначасова вельмі кранальнай і натхняючай. У лепшых традыцыях тужлівых песень на востра-сацыяльныя тэмы. Для паўнаты карцінкі не хапае толькі адпаведнага відэа. Але, неяк мне думаецца, што Open Space “падмітусяцца” і здымуць на яе кліп, які з радасцю расцягнуць усе тэлеканалы.
Песні "Pressure" нібыта выцякаюць адна з другой. Музычна ў Open Space стала меньш цукровага аптымізму першага альбому. Некаторыя кампазіцыя гучаць жорстка і часам нават няветліва – да прыкладу “духапад’ёмны” баевік Black Heart Queen.
Песняй, якая дала назву альбому, "Under Pressure" Open Space упэўнена даюць усім зразумець, што пасля выхаду першага альбома каманду відавочна не даацанілі, пад гэтым самым “ціскам” бясконцай крытыкі. І прапануюць прыглядзецца да іх творчасці паўважлівей.
У агульным, альбом Open Spaceс і насамрэч поўніцца радыёхітамі. Праўда, наўрад ці шмат каму ён па-сапраўднаму замарочыць галаву ды надоўга затрымаецца ў плэй-лісце ўласнага плэеера. Адно дакладна – дзяўчатам старэйшага школьнага ўзросту ці студэнтам і ахвочым да “трэндавага” вобліку хіпстэрам спадабаецца.
