Нямецкія балерыны занадта худыя, а ў Кітаі — таксі-беспілотнікі — #ІхНоравы

16/05/2024 - 17:24

Замежныя навіны / @rubanau_collage

Амаль усе дрэвы ў Германіі хворыя. І гэта не адзіная праблема, якая турбуе сёння немцаў. "Балерыны не павінны худнець на шкоду здароўю!" — заявілі акадэмікі Мюнхена, абвясціўшы вайну выдуманым стандартам зграбнасці танцорак.

Ці падтрымаюць гэты парыў у іншых краінах свету? Пакуль незразумела. Больш падрабязна пра гэта чытайце ў нашай традыцыйнай рубрыцы "Іх норавы".

Замежнікі скупляюць нерухомасць у Іспаніі

У 2023 годзе ў Іспаніі прадалі больш за 583 тысячы аб'ектаў нерухомасці, 87 тысяч з якіх набылі замежнікі. Гэта стала рэкордам за апошнія некалькі гадоў.

Найбольшай папулярнасцю ў пакупнікоў карыстаюцца Балеарскія астравы, за імі ідуць Канарскія астравы, рэгіён Валенсіі, Андалусія і Каталонія.

Немецкие балерины слишком худые, а в Китае — такси-беспилотники #ИхНравы

Беспілотны мінівэн для таксі / CarNewsChina / Baidu Apollo RT6

Амаль усе дрэвы ў Германіі хворыя

Восемдзесят працэнтаў нямецкіх дрэў хварэюць. Пра гэта заявіў міністр харчавання і сельскай гаспадаркі Джэм Аздэмір, спаслаўшыся на новае даследаванне.

Па словах навукоўцаў, на сітуацыю ўплываюць засуха, высокія тэмпературы і караеды. Ад занадта мяккай зімы гэтыя жукі не гінуць у халодны час. А гарачым летам становяцца сапраўднай праблемай.

Міністэрства назірае за станам лясоў у краіне з 1984 года. Асабліва моцна здароўе дрэў пагоршылася ў 2019 годзе — і з тых часоў лічыцца фактычна крызісным.

— Трэба хутчэй змагацца з пацяпленнем клімату, а таксама рабіць лясы мяшанымі і кліматычна ўстойлівымі, — кажа Аздэмір. — Гэта праект на шмат пакаленняў.

У 2024 годзе на аздараўленне лясоў у Германіі выдаткавалі 250 мільёнаў еўра.

Балерынам у Мюнхене не дазволяць быць занадта худымі

Акадэмікі мюнхенскай балетнай школы б'юць трывогу: стандарты зграбнасці, да якіх імкнуцца танцоркі, занадта вузкія. А дзяўчаты, якія не адпавядаюць ім, зведваюць жорсткую крытыку ў прафесіі.

Спецыялісты звяртаюць увагу, што гэта вельмі шкодзіць фізічнаму і ментальнаму здароўю асабліва юных балерын. Каб вырашыць праблему, яны прыдумалі новыя нормы — разам з балетам у школах балерын будуць навучаць медыцынскім аспектам танца і правільнаму харчаванню.

Таксама ім прапануюць псіхалагічную падтрымку і будуць сачыць за тым, каб яны ні ў якім разе не худнелі на шкоду свайму здароўю.

— Ні адно цела не можа лічыцца стапрацэнтна прыдатным для балета, — тлумачыць фізіятэрапеўт, выкладчык анатоміі і былы прафесійны танцор Марк Гайфес.