Не змаглі знайсці тых, хто біў — справы аб гвалце ў міліцыі не будзе
![Упраўленне СК па Гомельскай вобласці / gp.by](/sites/default/files/styles/gallery_main/public/2023-08/gomel_sk_2_02_01.jpg.webp?itok=gVqWq54W)
Упраўленне СК па Гомельскай вобласці / gp.by
Жыхару Гомеля Дзмітрыю Лукомскаму прыйшоў адказ на яго заяву з просьбай узбудзіць крымінальную справу па факце яго збіцьця супрацоўнікамі міліцыі — справы не будзе.
У міліцыі ён апынуўся 11 жніўня пасля затрымання ў цэнтры горада. Яго білі пры затрыманні, і пазней у РУУС.
"Кожны супрацоўнік, які праходзіў міма мяне, калі я ляжаў на падлозе, біў мяне нагой у пахвіну. Яны крычалі: "Лукомскі, табе патрэбен адвакат?"Калі я казаў, што патрэбны, мяне білі яшчэ мацней", — распавёў мужчына агенцтву БелаПАН.
Прычым білі, кажа Лукомскі, тады не яго аднаго.
"Там, у Цэнтральным РАУС, 11 жніўня проста была катавальная камера, паўсюль былі крыкі, стогны, па падлозе валяліся выбітыя зубы", — успамінае мужчына. У ізалятар часовага ўтрымання, па яго словах, ён трапіў у несвядомым стане.
Пасля вызвалення мужчына зняў пабоі, прайшоў экспертызу і напісаў заяву ў Следчы камітэт з патрабаваннем распачаць крымінальную справу ў дачыненні да супрацоўнікаў міліцыі, якія яго збівалі. Апазнаць сваіх крыўдзіцеляў Лукомскі не мог — яны былі ў балаклавах.
1 лютага мужчына атрымаў адказ — яму адмовілі ва ўзбуджэнні крымінальнай справы. Як вынікае з адказу, следчыя апыталі супрацоўнікаў Цэнтральнага РАУС, і ўсе яны паведамілі, што "ніхто супрацьпраўных дзеянняў у дачыненні да Лукомскага не здзяйсняў, неабгрунтаваная фізічная сіла і спецыяльныя сродкі да яго не ўжываліся". А запісы з камер відэаназірання, якія устаноўлены у памяшканнях АУС, не захаваліся.
"У сувязі з гэтым усталяваць і апытаць супрацоўнікаў АУС або вайсковай часткі, якія ажыццяўлялі затрыманне Лукомскага, не ўяўляецца магчымым", — напісана ў пастанове СК. А цялесныя пашкоджанні ў Лукомскага " маглі ўтварыцца ў выніку прымянення да яго фізічнай сілы і спецсродкаў .... у межах прадстаўленых ім (супрацоўнікам міліцыі —Еўрарадыё) паўнамоцтваў для спынення адміністрацыйнага правапарушэння".
Мужчына застаўся ўражаны адказам.
"Мяне збілі ні за што, зламалі тэлефон, ровар, гадзіннік, я выйшаў з ІЧУ ўвесь сіні, месяц кульгаў, у мяне было страсенне мозгу — але гэта ўсё законна? Калі я быў у следчага, ён мне нібыта спачуваў і здзіўляўся, што так мяне пабілі ў міліцыі, тое ж самае было на экспертызе. Але, як аказалася — гэта ўсё сістэма", — пракаментаваў адказ СК Лукомскі.
Нягледзячы на мноства сведчанняў і заяваў ад пацярпелых, у Беларусі да гэтага часу не ўзбуджана ніводнай крымінальнай справы паводле фактаў гвалту з боку сілавікоў. Суседнія краіны заявілі аб гатоўнасці расследаваць такія факты па універсальнай працэдуры. У прыватнасці, у Генпракуратуру Літвы ў лістападзе была пададзеная заява па факце збіцця бізнэсоўца Максіма Харашына.
![Не смогли найти тех, кто бил — дела о насилии в милиции не будет](/sites/default/files/paragraphs/image/charoszyn202.jpg)
У студзені дарадца Святланы Ціханоўскай Аляксандр Дабравольскі паведамляў, што такія справы могуць быць разгледжаныя таксама ў Польшчы і Чэхіі.
У самой Беларусі з унясеннем змены ў Крымінальна-працэсуальны кодэкс следства атрымала магчымасць цягнуць з адказам па такіх заявах неабмежаваную колькасць часу.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.