Настаўніцу з 20-гадовым стажам асудзілі за захоўванне "экстрэмісцкай" кнігі

У Слоніме ў Гродзенскай вобласці настаўніцу з 20-гадовым стажам асудзілі за захоўванне "экстрэмісцкай" кнігі па гісторыі, пішуць праваабаронцы. На працягу двух месяцаў яна спрабавала яе прадаць, як непатрэбную, але пакупнікоў не знайшлося. Аб'яву заўважылі сілавікі.

У судзе жанчына казала, што нават не падазравала, што кнігу ў Беларусі прызналі "экстрэмісцкім матэрыялам". Пяць гадоў таму яна купіла яе ў краме для дачкі-школьніцы. Летам яна прыбіралася ў кватэры і, убачыўшы гэтую кнігу ў добрым стане, вырашыла яе прадаць. Пакупнікоў не знайшлося, таму кнігу настаўніца найхутчэй здала ў макулатуру.

У выніку суд аштрафаваў настаўніцу на 370 рублёў. Яе камп'ютар канфіскаваны.

"Крамольнай" аказалася кніга Анатоля Тараса "Кароткі курс гісторыі Беларусі IX — XXI стст.". У "рэспубліканскі спіс экстрэмісцкіх матэрыялаў" яе дадалі ў верасні 2022-га. Пракуратура кантралявала, каб кнігі Тараса не было ў продажы.