На Таганрогскім авіярамонтным заводзе пацвердзілі прыбыццё самалёта з Беларусі

Самалёт А-50 з бартавым нумарам 43, які вылецеў з Беларусі 2 сакавіка, цяпер знаходзіцца на 325-м авіяцыйным рамонтным заводзе ў Таганрогу. Гэта журналістам zerkalo.io пацвердзілі на самім заводзе.

Пад выглядам супрацоўніцы беларускага аэрадрома ў Мачулішчах журналістка затэлефанавала на Таганрогскі авіяцыйны навукова-тэхнічны комплекс імя Г.М. Берыева. У яго склад уваходзіць 325-ы авіярамонтны завод, які займаецца аднаўленнем такой тэхнікі. У прыёмнай пацвердзілі, што самалёт з бартавым нумарам 43 паступіў да іх.

"— Я вам тэлефаную з нагоды рамонту самалёта А-50, які з Беларусі да вас паступіў. Маё начальства сказала ў вас ўдакладніць падрабязнасці…

— А-50? 43-й борт вы маеце на ўвазе?

— Так-так.

— Я вам дам тэлефон, звяжацеся па ім. Гэта дырэктар дырэкцыі гарантыйнага і сэрвіснага абслугоўвання.

— Проста мне даюць гэтыя нумары, мне хаця б трэба даведацца, колькі самалёт на рамонце будзе…

— Гэта дакладна да яго. Гэты самалёт у яго ведамства паступіў.

— Гэта дакладна той самалёт, з Беларусі?

— Так-так, той, які ўчора да нас прыбыў".

Расійскі самалёт А-50 у Мачулішчах пад Мінскам, як паведамляла аб'яднанне экс-сілавкоў Bypol, быў пашкоджаны 26 лютага. Яго атакавалі двума дронамі беларускія партызаны.

Дзяржпрапаганда сцвярджала, што з самалётам усё ў парадку, а 2 сакавіка паказала відэа з яго палётам. Прэс-служба Лукашэнкі і ўвогуле заявіла, быццам расійскі самалёт суправаджаў "борт №1". У той жа дзень тг-канал "Беларускі Гаюн" паведаміў, што самалёт адправіўся на рамонт на авіязавод у Таганрогу. Цяпер гэтыя звесткі пацвердзіліся.