На матчы ў “Мінск-Арэне” шайбай моцна паранены глядач

“Ніхто з нас пяцярых нават не бачыў, куды ляцела шайба, як яна да нас трапіла. Адкуль яна адрыкашэціла. Ужо потым нам сказалі, што шайба спачатку ўдарылася аб шкло, а потым прыляцела нашаму сябру ў галаву”, — расказвае Еўрарадыё сяброўка пацярпелага Наталля.

Шайба вылятае на трыбуны напрыканцы напружанай гульні вечарам 13 траўня. Латвія выйграе ў Казахстана ўсяго адзін гол, гледачы захопленыя матчам, і таму на няшчасны выпадак мала хто звяртае ўвагу. Акрамя Яна (так завуць пацярпелага) і яго сяброў. Заўважыўшы кроў, яны дапамагаюць Яну дайсці да медпункта “Мінск-Арэны”, дзе хлопцу аказваюць першую дапамогу і выклікаюць хуткую. Наталля гаворыць, што перад тым як зрабіць гэта, супрацоўнікі медпункта разам з прадстаўнікамі адміністрацыі арэны доўга запаўняюць нейкія паперы. А на развітанне аддаюць Яну… шайбу. А яшчэ настойліва просяць “не раздуваць скандалу”.

У “Мінск-Арэне” інцыдэнт пацвярджаюць, але не больш. Маўляў, шайбы насамрэч часам вылятаюць на трыбуны выпадкова, часам хакеісты наўмысна іх выкідваюць. Аднак сур’ёзных наступстваў для гледачоў гэта, як правіла, не мае. У Мінспорту на пытанне Еўрарадыё аб магчымай кампенсацыі пацярпеламу заўзятару гавораць, што хакей — гэта спорт. А значыць, элемент рызыкі прысутнічае.

“І ў любой іншай сітуацыі мы разлічваем на лепшае і на гэта спадзяемся. Аднак можа адбыцца ўсё што заўгодна. А тут… Ну што значыць не была забяспечаная бяспека? Гэта спартыўнае мерапрыемства. У якім элемент рызыкі ўсё адно прысутнічае”.

З “Мінск-Арэны” “хуткая” адвозіць параненага шайбай заўзятара ў адну са сталічных бальніц. Пасля кароткага агляду дактары вырашаюць пакінуць хлопца ў сябе — падазраюць пераломы костак чэрапа ў двух месцах. Сяброўка Яна Наталля расказвае Еўрарадыё, што медыкі дагэтуль не ведаюць дакладна, што з яе сябрам.

“Учора вечарам мы сазвоньваліся. І дактары нам паведамілі, што ёсць нейкія нядобрыя навіны… Але яны пакуль нічога канкрэтнага не гавораць. МРТ перанеслі з учарашняга дня на сёння. Мяркуюць, што давядзецца рабіць аперацыю”.

Як толькі медыкі змогуць паставіць дакладны дыягназ, блізкія Яна вырашаць, ці будуць патрабаваць кампенсацыі за непрыемнае здарэнне.

Апошнія навіны

Галоўнае

Выбар рэдакцыі