"Мы станем у апазіцыю" — у жаночай роце АМАП бунт супраць камандзіра аддзялення
Амапаўцы
У жаночай роце АМАП адбыўся бунт супраць прызначэння новага камандзіра аддзялення. Гэта стала вядома з тэлефонных размоваў амапаўцаў, перахопленых "Кіберпартызанамі".
Гаворка ідзе пра Ганну Шахаву, якая выйграла ў конкурсе прыгажосці "Міс мінская міліцыя — 2026". Яна ў 2020 годзе ўдзельнічала ў разгоне пратэстаў.
Пра бунт супраць яе прызначэння на камандзірскую пасаду стала вядома з размоваў паміж камандзірам узвода АМАП Аксанай Краўчанка і начальнікам аддзялення мінскага АМАП Алега Барадаўкі, а таксама Краўчанка — з яе саслужывіцай Ганнай Лецка. "Кіберпартызаны" не ўдакладняюць, калі менавіта адбылася гэтыя размовы.
Краўчанка скардзіцца, што падначаленыя ў штыкі прынялі прызначэнне Шахавай. Яны заявілі: "Мы станем у апазіцыю, мы не будзем яе слухаць!" Паводле іх, Шахава ігнаравала свае службовыя абавязкі, "ёй гэта не трэба". Акрамя таго, Лецка заявіла, што Шахаву неаднаразова лавілі на хлусні.
