Міністр абароны Украіны патлумачыў, чаму контрнаступленне ідзе не так хутка

Міністр абароны Украіны Аляксей Рэзнікаў прызнаў, што ўкраінскі наступ адстае ад графіка. Але папрасіў "не хвалявацца", бо ўсё ідзе паводле плану. Пра гэта ён казаў у інтэрв'ю CNN. Рэзнікаў назваў памылковым меркаванне, што "кожнае контрнаступленне павінна быць хуткім". Хутка гэтым разам не атрымліваецца, бо "у нас вельмі доўгая лінія фронту. І мы маем супраць сябе вялікую колькасць ворагаў".

"Гэта вайна, а не кампутарная гульня", — адзначыў украінскі міністр абароны. Сярод прычын запаволенага наступу ён назваў сітуацыю з боепрыпасамі і артылерыяй, а таксама расійскія мінныя палі. Украінскія сапёры вымушаныя ўручную размініраваць і пракладаць шляхі. І тут на коне іх жыцці. "Нам трэба вельмі павольна выкарыстоўваць нашых салдат, сапёраў, і вельмі павольна рыхтаваць калідоры для рэальнага наступальнага руху", — сказаў Рэзнікаў.

У гэтым жа інтэрв'ю Рэзнікаў распавёў, што ўзброеныя сілы Украіны працягнуць наносіць удары па акупаваным Крыме і Керчанскім мосце. Паводле яго слоў, гэта павінна знізіць баяздольнасць расіян і дапамагчы выратаваць жыцці ўкраінскіх воінаў. "Гэта нармальная тактыка — разбурыць лагістычныя лініі ворага, каб пазбавіць магчымасці атрымаць больш боепрыпасаў, атрымаць больш паліва, атрымаць больш ежы і гэтак далей. Вось чаму мы будзем выкарыстоўваць гэтую тактыку супраць іх", — дадаў Рэзнікаў.

Нагадаем, сур'ёзныя ўдары па Керчанскім мосце — пераправе паміж Крымам і мацерыковай Расіяй — наносіліся ўжо двойчы. У кастрычніку 2022 года ў выніку выбуху абрынулася частка пераправы. А гэтым летам мост пацярпеў ад атакі дронаў.