Вы тут

Мінаховы здароўя патлумачыла, чаму набывалі незарэгістраваную вакцыну

Людміла Равуцкая. Фота: БЕЛТА

У сераду прадстаўнікі Міністэрства аховы здароўя Беларусі на брыфінгу патлумачылі, чаму набывалі незарэгістраваную вакцыну "Эўпента" вытворчасці Паўднёвай Карэі. Як інфармуе БЕЛТА, кіраўніца ўпраўлення фармацэўтычнай інспекцыі і арганізацыі лекавага забеспячэння міністэрства Людміла Равуцкая распавяла, што летась у нашай краіне склалася "крытычная сітуацыя". Яна была звязаная з тым, што адбыліся пастаўкі неякасных серый вакцыны расійскай вытворчасці АКДС (іх перыядычна бракавалі і вярталі пастаўшчыку). І мог адбыцца зрыў Нацыянальнага календару прышчэпак, магла з'явіцца пагроза масавага распаўсюду небяспечных інфекцый, кажа чыноўніца.

І калі "буйныя заходнія кампаніі", да якіх звярнуліся беларускія чыноўнікі, адмовілі (яны, нібыта, не мелі дастаткова часу, каб вырабіць вакцыны), Міністэрства аховы здароўя пачало выбіраць паміж вакцынамі вытворчасці Індыі, Кітая і Паўднёвай Карэі. Чыноўнікі выбралі апошнюю, якая не была зарэгістраваная ў нашай краіне.

Міністэрства аховы здароўя на тым жа брыфінгу агучыла верагодную прычыну смерці 2-месячнага дзіцяці ў жніўні ў Ганцавіцкім раёне пасля прышчэпкі: "Верагоднай прычынай крытычнага стану з'явілася анафілаксія з прычыны ўвядзення вакцын".

Нядаўна інтэрнэт-выданне "Ежедневник" напісала пра згаданую паўднёвакарэйскую вакцыну "Эўпента". Сцвярджалася, што беларускім дзецям адмыслова прышчапляюць неправераную вакцыну, якая не мае беларускай сертыфікацыі. Міністэрства аховы здароўя заявіла, што публікацыя можа нанесці "шкоду нацыянальнай бяспецы Рэспублікі Беларусь у сферы аховы здароўя", накіравала дакументы ў Генпракуратуру. Следчы камітэт працягвае праверку па факце смерці дзіцяці, спецыялісты правяраюць якасць і паходжанне прэпарату.