Мінабароны Расіі заявіла пра спыненне ўручэння позваў па мабілізацыі
Мабілізацыя ў Расіі / kommersant.ru
Мінабароны Расіі заявіла пра спыненне падрыхтоўкі і ўручэння позваў па мабілізацыі. Афіцыйна сцвярджаецца, што "мерапрыемствы частковай мабілізацыі", якія праводзіліся ваенкаматамі сумесна з мясцовымі ўладамі, завершаныя. Генштаб Узброеных сіл РФ накіраваў адпаведныя загады камандуючым войскамі вайсковых акругаў. Яны да 1 лістапада павінны паведаміць пра выкананне.
"У далейшым праца ваенных камісарыятаў па камплектаванні Узброеных Сіл РФ будзе арганізавана толькі за кошт прыёму добраахвотнікаў і кандыдатаў для праходжання ваеннай службы па кантракце", — піша расійскае Мінабароны.
Аднак афіцыйнага ўказа аб завяршэнні ў Расіі мабілізацыі няма, адзначае @novaya_europe.
Пра тое, што "частковая мабілізацыя" заканчваецца, 28 кастрычніка заявіў міністр абароны РФ Сяргей Шайгу. Было прызвана 300 тысяч чалавек, частка з іх ужо ваюць ва Украіне, ці загінулі там, альбо трапілі ў палон.
Ратуючыся ад мабілізацыі, сотні тысяч расіян выехалі за мяжу.
