Маці мінчука абвяргае, што яго затрымалі за рэгістрацыю ў чат-боце "Перамога"
Дзяржаўныя журналісты пачалі хваліцца ў сваіх блогах, што ГУБАЗіК затрымаў двух чалавек, якія зарэгістраваліся чат-боце "Перамога". У якасці доказаў з'явіліся два відэа, ня кія маладыя хлопцы кажуць, што іх затрымалі праз пару дзён пасля рэгістрацыі.
У каментары "Нашай Ніве" маці аднаго з затрыманых абвергла гэтую версію.
Праграмісту Андрэю 29 гадоў. Ён жыве з маці, халасты, дзяцей няма.
Па словах жанчыны, ператрус у іх дома пачаўся каля паловы дзявятай раніцы, ладзілі яго чалавек восем, якія былі не ў форме, але ў чорных масках (верагодна, балаклавы).
"Я пыталася ў іх, што зрабіў мой сын. Адказвалі: напісаў каментар, абразіў загінулых пілотаў, гэта крымінальная справа, цяпер паедзе ў Следчы камітэт. Вам, кажуць, пасля следчы набярэ.
Пакуль мне ніхто не званіў. Я сама пачала шукаць сына, у СК мне далі тэлефон Фрунзенскага РУУСа. Але там яго няма, дзе цяпер сын, я не ведаю. Не ведаю, у якім ён статусе, па якім артыкуле абвінавачваюць.
Я спытала і ў сына: што такое, што можа быць? Ён паспеў адказаць толькі, што і сам не ведае. Кажа, магчыма, за нейкі камент", — расказвае жанчына.
Маці не верыць, што Андрэй стаў бы абражаць загінулых. А відэа, якое апублікавалі дзяржаўныя журналісты, называе зробленым пад прымусам.
Пасля гібелі пілотаў ваеннага самалёта ў Баранавічах Аляксандр Лукашэнка загадаў сілавікам знайсці ўсіх, хто піша ў інтэрнэце негатыўныя каментары пра загінулых лётчыкаў і пакараць. Пасля гэтага паведамлялася пра затрыманне 20 чалавек, ім пагражае крымінальная справа за "распальванне сацыяльнай варожасці".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.