Лябедзька: Наконт збору 100 тысяч подпісаў не можам сказаць "так" ці "не"

Агенцтва БелаПАН паведаміла, што ініцыятыўная група Анатоля Лябедзькі не паспее сабраць 100 тысяч подпісаў за вылучэнне лідара АГП кандыдатам у прэзідэнты. Са спасылкай на кіраўніка групы Льва Марголіна агенцтва паведаміла, што на цяперашні час сабрана больш за 50 тысяч подпісаў.

"Рэальна сабраць 100 тысяч подпісаў у нас не атрымаецца, могуць быць толькі фантастычныя варыянты. Здаваць подпісы ў выбарчыя камісіі, хутчэй за ўсё, не будзем, звязем у офіс, каб усе маглі пераканацца ў рэальнасці таго, што мы іх сапраўды сабралі, а не "намалявалі", — перадае БелаПАН словы Марголіна.

Аднак сам прэтэндэнт на прэзідэнцкую пасаду абвяргае гэтыя звесткі:

Лябедзька: "Няма ад Марголіна ніякай інфармацыі, што не сабралі сто тысяч. Уся інфармацыя будзе (і гэта гаворыць Марголін!) на прэсавай канферэнцыі ў панядзелак".

Нагадаем, што пра збор 100 тысяч подпісаў абвясцілі ініцыятыўныя групы пяці з васьмі прэтэндэнтаў на пасаду прэзідэнта. Гэта групы Аляксандра Лукашэнкі, Віктара Цярэшчанкі, Сяргея Гайдукевіча, Таццяны Караткевіч і Мікалая Улаховіча.

Еўрарадыё пацікавілася ў палітыка, ці верыць ён, што групы астатніх прэтэндэнтаў сабралі неабходную колькасць подпісаў. Лябедзька адзначыў, што не хоча лічыць чужыя галасы, але дадаў:

Лябедзька: "Калі выключыць Аляксандра Лукашэнку, то па інтэнсіўнасці пікетаў, збору подпісаў, прафесійнасці каманды мы былі калі не адметнымі, то — адны з самых. І калі мы не можам сказаць ні "так", ні "не", а астатнія ўжо адрапартавалі... Ну, я не ведаю — у кожнага тут свае мэты і задачы".

Збор подпісаў за вылучэнне кандыдатаў у прэзідэнты працягнецца да 21 жніўня ўключна.

Фота: ucpb.org