Вы тут

Лукашэнка: Я не дажыву да гэтага, пакуль Коля стане прэзідэнтам

Аляксандр Лукашэнка не хоча, каб яго малодшы сын Мікалай быў прэзідэнтам пасля яго. Пра гэта беларускі кіраўнік паведаміў у эксклюзіўным інтэрв'ю першаму намесніку гендырэктара ТАСС Міхаілу Гусману.

"Слухай, ну гэта ідыятызм... У нас не раней за 35 гадоў ты можаш стаць прэзідэнтам. Гэта што, я яшчэ 20 гадоў павінен быць прэзідэнтам?! Ды я не дажыву да гэтага, пакуль Коля стане прэзідэнтам", — цытуюць СМІ словы Лукашэнкі ў адказ на пытанне пра магчымую будучыню Колі.

Кіраўнік Беларусі паведаміў, што яго сям'і разумеюць: Лукашэнка не валадарыць, а служыць. "Адна справа — валадарыць, а іншая — служыць. Служыць цяжка, і яны бачаць гэтую ношу, якую мне даводзіцца цягнуць. І яны бачаць усе недахопы гэтага. І мой малы, меншы, гэта ж разумее ўсё. Я пытаюся: "Коля, чым будзем займацца, калі вырасцем?" — "Толькі не тваёй працай". Ведаеш, вось так вось, праз губу", — распавёў Лукашэнка.

Па яго словах, малодшага сына "шпігавалі спортам і музыкай", каб ён вырас без недахопаў сённяшняй моладзі. Разам з тым пры Лукашэнку-малодшым ёсць ад'ютант.

"Калі я накасіў травы (і ён гэта ўмее рабіць, ты ведаеш), ён прыязджае са сваім прымацаваным, у яго ад'ютант ёсць, на грузавым аўтамабілі, яны загружаюць гэтую траву і вязуць у дапаможную гаспадарку карміць кароў. А потым малако і малочныя прадукты адсюль жа вязуць старым. Я хачу, каб ён быў чалавекам. Чалавекам. Усё", — даў характарыстыку беларускі кіраўнік.