Лукашэнка: трэба стварыць сакрэтную мабільную сувязь
"Мы стварылі свае сістэмы сувязі, свае цэнтры шыфравання інфармацыі, недаступныя для разведак іншых дзяржаў".
21 лістапада Аляксандр Лукашэнка сабраў нараду аб развіцці сістэмы урадавай сувязі.
Беларускі кіраўнік падкрэсліў, што ў нашай дзяржаве ёсць засакрэчаная стацыянарная сувязь. "У прэзідэнта на стале распрацоўкі стацыянарнай айчыннай сувязі, усе вышэйшыя службовыя асобы, чальцы ўрада маюць нядрэнную стацыянарную сувязь. Але самае галоўнае, што мы ў гэтым выпадку абсалютна незалежныя. Мы стварылі свае сістэмы сувязі, свае цэнтры шыфравання інфармацыі, недаступныя для разведак іншых дзяржаў", — перадае БЕЛТА словы Лукашэнкі.
Пры гэтым ён паставіў задачу стварыць такую ж засакрэчаную мабільную сувязь. "Мы сёння робім і тэстуем некаторыя сістэмы не стацыянарнай, а мабільнай сувязі. У кожнага сёння мабільны тэлефон: узяў, затэлефанаваў — увесь свет ведае, пра што ты кажаш. Трэба стварыць такую сувязь, але абароненую. Як у народзе кажуць, сакрэтную сувязь. Мы тэстуем такую сувязь", — прызнаўся кіраўнік дзяржавы.
Як паведамляла раней Еўрарадыё, у жніўні Лукашэнка наведваў адзін з аб'ектаў урадавай сувязі, падпарадкаваны Камітэту дзяржаўнай бяспекі. Там яму распавялі аб распрацоўцы сістэм рухомай урадавай радыёсувязі, паказалі сродкі сувязі і апаратуру шыфравання, у тым ліку абароненую мабільную тэлефонную сувязь.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.