Лукашэнка расказаў пра перамовы па "закрытых каналах" пра палітвязняў
Аляксандр Лукашэнка ў Астравецкім раёне / president.gov.by
Падчас паездкі ў Астравецкі раён 3 лістапада Лукашэнка намякнуў, што гатовы да гандлю палітвязнямі, але "для гэтага павінны быць пэўныя ўмовы".
Ён згадаў нядаўнія парламенцкія выбары ў Польшчы і паведаміў, што не чакае пасля іх змены польскай палітыкі адносна беларускага рэжыму. Але, нібыта, перамовы з Польшчай па закрытых каналах усё ж адбываюцца.
"Па закрытых каналах мы з імі размаўляем, яны выстаўляюць мне нейкія ўмовы: "Ты там гэтага адпусці, гэтага адпусці". Ён закон парушыў, як я яго адпушчу. Для гэтага павінны быць пэўныя ўмовы", — перадае БЕЛТА словы Лукашэнкі.
Ён не паведаміў, пра якіх палітвязняў ідзе гаворка. Аднак раней польскія палітыкі і чыноўнікі неаднаразова заяўлялі, што пацяпленне ў беларуска-польскіх адносінах можа наступіць толькі пры вызваленні актывіста польскай меншасці Анджэя Пачобута.
