Лукашэнка — Нарышкіну: мы і не хаваем, сітуацыя вакол нас няпростая
22 кастрычніка ў Мінску ў Палацы Незалежнасці праходзіць сустрэча Аляксандра Лукашэнкі і кіраўніка Службы знешняй разведкі Расіі Сяргея Нарышкіна. "Мы і не хаваем, сітуацыя вакол нас няпростая", — цытуе словы Лукашэнкі БЕЛТА. Пры гэтым ён падкрэсліў, што мае на ўвазе саюзную дзяржаву Беларусі і Расіі. Аляксандр Лукашэнка падзякаваў госцю з Масквы за інфармацыю, якую рэгулярна атрымліваць беларускія спецслужбы і асабіста ён.
"У гэтым свеце шалёным, асабліва ашалелым ад гэтай пандэміі і гэтак далей, сяброў у нас няшмат, — прызнаўся Аляксандр Лукашэнка. — Будзем казаць адкрыта, ва ўсіх цікавасць да нас. Да Расіі і Беларусі. Мы павінны рэагаваць".
Візіт кіраўніка СВР РФ у нашу краіну адбыўся на фоне пратэстаў, якія адбываюцца з пачатку жніўня і за некалькі дзён да заканчэння тэрміну "народнага ўльтыматуму" Святланы Ціханоўскай.
Нарышкін перадаў Лукашэнку прывітанне ад расійскага прэзідэнта Уладзіміра Пуціна. "Я ўпэўнены ў тым, што спецслужбы могуць зрабіць яшчэ многае для таго, каб забяспечыць інтарэсы нашых дзяржаў, нашых грамадзян, абараніць ад тых пагроз, якія з пэўнай перыядычнасцю ўзнікаюць", — сказаў кіраўнік СВР.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
