Ліз Трас прыняла прапанову Уладзіміра Зяленскага наведаць Украіну

Першым замежным палітыкам, з якім Ліз Трас паразмаўляла пасля свайго прызначэння на пасаду прэм'ер-міністра Вялікабрытаніі, стаў прэзідэнт Украіны. Пра гэта Уладзімір Зяленскі паведаміў у сваім акаўнце ў Твітары.

Зяленскі запрасіў яе наведаць Украіну і падзякаваў народу Вялікабрытаніі за ваенную і эканамічную дапамогу. "Важна, што Вялікабрытанія гатовая яшчэ больш яе ўмацаваць", — дадаў ён.

Зяленскі паведаміў, што ў размове з Трас абмяркоўваліся гарантыі бяспекі для Украіны, а таксама ўдзел Лондана ў аднаўленні краіны.

Па выніках размовы прэс-сакратар брытанскага ўрада паведаміла, што Трас прыняла прапанову наведаць Украіну. 

"У сваёй першай тэлефоннай размове з замежным лідарам пасля ўступлення на пасаду прэм'ер-міністра [Трас] пацвердзіла сваю поўную падтрымку ўкраінскаму лідару і заявіла, што Украіна можа разлічваць на доўгатэрміновую дапамогу Вялікабрытаніі", — перадае Бі-Бі-Сі яе словы. 

Яна ўдакладніла, што Трас і Зяленскі абмяркоўвалі "меры, неабходныя для таго, каб перарэзаць паток сродкаў, якія фінансуюць ваенную машыну Пуціна".