Вы тут

Лекары баяцца праверак: дапамогу валанцёраў нельга прымаць проста так

Лячэнне пацыента з COVID-19 / Reuters

Беларускія дактары асцерагаюцца прымаць дапамогу валанцёраў з-за таго, што не паспяваюць правільна яе аформіць. Медработнікі губляюць каштоўны час за справаздачамі і непакояцца з-за праверак з пракуратуры. Пры гэтым дапамога медустановам усё яшчэ патрэбная — і неабыякавыя беларусы гатовыя яе аказваць. Ці ёсць рашэнне праблемы?

Маніторынг — зыходзячы з сітуацыі 

Пра тое, што медсёстры "з'язджаюць з глузду ад пісаніны" пры афармленні спонсарскай дапамогі, расказаў Уладзімір Мартаў, віцебскі рэаніматолаг: 

"Мне прывозяць дыхальныя апараты, сродкі абароны, я іх хапаю, таму што яны мне патрэбныя проста зараз, і іду працаваць. Але я не ведаю, ці правільна я іх схапіў або не. Старэйшая медсястра проста з'зджае з глузду цяпер ад пісаніны — спонсарскую дапамогу трэба правільна аформіць. Калегу ўжо тэлефанавалі з пракуратуры, нагадвалі пра працэдуру атрымання спонсарскай дапамогі. Праверкі ўжо пачаліся".

Перадача дапамогі ў беларускія бальніцы / facebook.com

Еўрарадыё звярнулася па тлумачэнне ў Генпракуратуру: ці сапраўды зараз праходзяць такія праверкі і ў чым іх мэта? Можа, варта было б у сённяшняй сітуацыі іх прыпыніць, каб лекары не турбаваліся, прымаючы дапамогу ад валанцёраў?

Галоўная мэта маніторынгу — гэта праверыць, ці дастаткова забяспечаны сродкамі індывідуальнай абароны медыцынскія работнікі і насельніцтва. Ён праводзіцца, зыходзячы з ацэнкі сітуацыі. Усюды розная сітуацыя і эпідэміялагічная нагрузка. Тэрытарыяльныя калегі праводзяць маніторынгі, калі бачаць у гэтым неабходнасць, — тлумачыць Еўрарадыё афіцыйны прадстаўнік Генпракуратуры Дзмітрый Брылёў.

Шмат папяровай працы

Кацярына Сінюк, заснавальніца платформы "Имена", мяркуе, што медустановы часта не маюць вопыту заключэння спонсарскіх дамоваў і справаздач па іх. Раней яны проста не сутыкаліся з гэтым. З 8 красавіка валанцёры, перадаючы гуманітарны груз, сталі ўручаць медыкам інструкцыю па яго афармленні. Спіс дакументаў, праўда, выглядае ўнушальна.

 — Даводзіцца афармляць вельмі шмат дакументаў, а калі дапамога прыходзіць з-за мяжы, то гэта дадатковая справаздачнасць. Медработнікі губляюць час, які мог быць патрачаны больш эфектыўна! У выніку некаторыя бальніцы баяцца прымаць нашу дапамогу, хоць і маюць патрэбу ў ёй, мы бачым па запытах. Бывае, што на ўзроўні галоўдактароў публікуюцца забароны на прыём гуманітарнай дапамогі, — распавядае Кацярына Сінюк.

Паводле слоў актывіста Антона Матолькі, валанцёры выбудоўваюць працу так, каб дапамога па дакументах ішла праз адміністрацыю бальніц. Гумдапамогу вязуць па заяўках (іх ужо больш за 1500!), загадзя дамаўляючыся пра час.

Антон Матолька / Еўрарадыё

— Праблемы і насцярожанасць у некаторых бальніцах узнікалі, але мы іх у большасці выпадкаў хутка вырашаем і развейваем. На ўзроўні міністэрства няма перашкод, нават наадварот, наколькі мне вядома, яны падштурхоўваюць аблздравы і бальніцы, каб тыя не адмаўляліся ад дапамогі. Галоўнае, каб усё праходзіла правільна, па дакументах, бо потым будуць праверкі, — дзеліцца Антон Матолька.

Фонды гатовыя дапамагчы

"Имена" прапануюць спрасціць працэдуру аказання спонсарскай дапамогі медустановам. Ідэя ў тым, каб дазволіць дабрачынным фондам стаць пасярэднікамі паміж спонсарам і атрымальнікам дапамогі. Такім чынам, фонд мог бы збіраць грашовыя сродкі, дапамагчы адразу, напрыклад, ста бальніцам і ўзяць на сябе папяровую працу, якую зараз выконваюць медыкі. 

Мы маем зносіны са спецыялістамі з Мінэканомікі, юрыстамі. Заканадаўства, якое рэгулюе аказанне спонсарскай дапамогі, састарэла і ўскладняе сённяшнюю сітуацыю. На афіцыйнае змяненне указаў і дэкрэтаў сыдзе шмат часу. Улічваючы абстаноўку, трэба вырашаць, як хутчэй спрасціць гэтую працэдуру. Пандэмія — гэта наўрад ці гісторыя на адзін месяц, — рэзюмуе заснавальніца "Имён" Кацярына Сінюк.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.