Кракаўскую кампанію з беларускім кіраўніцтвам аштрафавалі за парушэнне санкцыяў
Аўтамабіль, ілюстрацыйнае фота / pixabay.com
Кракаўскую кампанію, якой кіруюць грамадзяне Беларусі, аштрафавалі на 5,5 млн долараў. У 2022–2023 гадах яна займалася пастаўкамі люксавых аўто ў Расію ў абыход санкцый, піша Infotrans Media Belarus.
Для гэтага выкарыстоўвалася схема фіктыўнага транзіту. Аўтамабілі фактычна заставаліся ў Расіі, але ў дакументах указваліся іншыя пункты прызначэння. Машыны дастаўлялі праз Польшчу, Літву і Беларусь.
Штраф выпісала польская падатковая. Гэта адзін з самых буйных штрафаў за парушэнне санкцый, уведзеных пасля пачатку поўнамаштабнага ўварвання Расіі ва Украіну.
Экспарт люксавых аўтамабіляў (коштам больш за 50 тыс. долараў) з Еўрасаюза ў Расію забаранілі з сакавіка 2022-га. Праз два гады санкцыі распаўсюдзілі і на Беларусь.
