Кіроўца трамвая ў Мінску скрала грошы з сумкі пасажыркі
Трамвай у Мінску, ілюстрацыйнае фота / Еўрарадыё
49-гадовую кіроўцу трамвая з Мінска вінавацяць у крадзяжы, піша інфармагенцтва "Мінск-Навіны".
У адзін з дзён пасажыр трамвая перадаў ёй сумку, якую нехта забыўся ў салоне. На канцавым прыпынку кіроўца сваёй курткай прыкрыла камеру відэаназірання ў кабіне і скрала з сумкі 100 рублёў. Пасля гэтага яна аднесла забытую рэч дыспетчару.
Мінчанка, якая забылася сумку ў трамваі, прыехала на дыспетчарскую станцыю. У прысутнасці работнікаў трамвайнага парку яна праверыла змесціва сумкі і выявіла прапажу грошай. Жанчына напісала заяву ў міліцыю.
Кіроўцу выкрылі. Свой учынак яна патлумачыла цяжкім матэрыяльным становішчам.
За крадзеж ёй пагражае да трох гадоў пазбаўлення волі. Цяпер жанчына знаходзіцца пад падпіскай аб нявыездзе і належных паводзінах.
