Інстытутам кантролю ведаў стаў кіраваць рэктар прыватнага ўніверсітэта
Рэспубліканскі інстытут кантролю ведаў (РІКВ) узначаліў Юрый Міксюк, паведамляе tut.by. На гэтай пасадзе ён змяніў Мікалая Фяськова, які кіраваў установай апошнія 15 гадоў.
71-гадовага Фяськова называюць стваральнікам сістэмы цэнтралізаванага тэставання ў Беларусі. Пра яго сыход у адстаўку стала вядома 30 лістапада. Паведамлялася, што ён пакінуў пасаду па ўзгадненні бакоў.
У Міністэрстве адукацыі адзначылі, стаж працы ў адукацыйнай галіне ў Фяськова складае 54 гады. "Мы цэнім яго вялікі ўнёсак у развіццё сістэмы адукацыі. Яго досвед запатрабаваны, Мікалай Фяськоў будзе і надалей працаваць у сістэме", — падкрэслілі ў ведамстве.
Юрый Міксюк, які прыйшоў яму на замену, з'яўляецца рэктарам Прыватнага інстытута кіравання і прадпрымальніцтва. Да працы ў ВНУ ён узначальваў упраўленне вышэйшай і сярэдняй спецыяльнай адукацыі Мінадукацыі.
