IKEA знайшла, чым замяніць драўніну з Беларусі і Расіі

Шведская кампанія IKEA знайшла альтэрнатыву пастаўкам драўніны з Ьеларусі і Расіі. Раней гэтыя краіны займалі пятае і шостае месца па аб'ёмах паставак, кажа менеджэр па пастаўках драўніны Ульф Ёхансан.

"Мы змаглі замяніць расійскія і беларускія аб'ёмы за кошт паставак з іншых краін на вельмі гарачым рынку драўніны", — цытуе Reuters словы Ёхансана.

Асноўнымі пастаўшчыкамі драўніны для кампаніі зараз стануць Польшча, Літва і Швецыя. Гэтыя краіны ўвайшлі ў тройку найбуйнейшых пастаўшчыкоў за 12 месяцаў да жніўня 2022 года.

К доўгатэрміновай перспектыве IKEA таксама не разглядае пастаўкі драўніны з Беларусі і Расіі, дадае Ёхансан.

Напрыканцы 2022-га IKEA трапіла ў гучны міжнародны скандал: СМІ Германіі і Францыі апублікавалі расследаванне пра супрацу кампаніі з калоніямі Беларусі. Для вытворчасці мэблі выкарытоўваецца праца зняволеных, у тым ліку палітвязняў. У самой карпарацыі адказалі, што разарвалі кантрактныя адносіны з нашай краінай пасля ўвядзення санкцый Еўрасаюза ў кастрычніку 2020 года.

Пасля публікацыі расследавання беларускі палітэмігрант Пётр Маркелаў правёў у чэшскай краме акцыю пратэсту супраць дзейнасці IKEA.