Хуткі цягнік “Стрыж” пачаў курсіраваць праз Беларусь (фота, відэа)
![Хуткі цягнік “Стрыж” пачаў курсіраваць праз Беларусь (фота, відэа)](/sites/default/files/styles/gallery_main/public/2023-08/strizh_1.jpg.webp?itok=rqXFjn8x)
Першы хуткі цягнік “Стрыж” Масква — Берлін прыбыў учора на станцыю Мінск-Пасажырскі. Яго сустрэлі прадстаўнікі галоўных чыгуначных кампаній Беларусі і Расіі і іспанскай кампаніі Patentes Talgo sl, чые тэхналогіі дазволілі пераадольваць адлегласць паміж дзвюма сталіцамі хутчэй на 4-5 гадзін, піша БЕЛТА.
Асаблівасць новага цягніка ў тым, што ён здольны пераходзіць з вузкакалейнай чыгункі на шырокакалейную і назад без змены вагонных цялежак. У 2015 годзе на станцыі “Брэст” была абсталяваная спецыяльная прылада для пропуску такіх цягнікоў тыпу Talgo. Гэта дазволіла скараціць час пераходу на іншую каляіну да 30 хвілін, калі астатнім цягнікам трэба каля 2 гадзін.
Першы “Стрыж” прыбыў у Мінск у 20.55 і прастаяў на пероне каля 14 хвілін. З галоўнага чыгуначнага вакзала беларускай сталіцы ў Заходнюю Еўропу адправілася 18 пасажыраў.
Цягнік “Стрыж” (Swift) Расійскай чыгункі будзе пераадольваць адлегласць ад Масквы да Берліна за 20 гадзін 14 хвілін. Назад ён дабярэцца да Масквы за 20 гадзін 35 хвілін. Раней на шлях трацілі 24 гадзіны 49 хвілін і 25 гадзін 56 хвілін адпаведна. “Стрыж” будзе курсіраваць 2 разы на тыдзень. З Масквы ён будзе адпраўляцца па суботах і нядзелях у 13.05 і прыбываць на станцыю Берлін Остбанхоф у 07.19 наступных сутак (па мясцовым часе). У шляху руху па Беларусі цягнік будзе рабіць тры прыпынкі: у Оршы (прыбыццё — 18.32), Мінску (прыбыццё — 20.55) і Брэсце (прыбыццё — 00.24).
З Берліна цягнік будзе адпраўляцца па нядзелях і панядзелках у 18.50 (па мясцовым часе). На зваротным шляху ў Брэст ён прыбудзе ў 05.38 наступных сутак, у Мінск — у 9.12, а ў Оршу — у 11.43. На Курскі вакзал Масквы цягнік прыбудзе ў 17.25. Больш падрабязна з раскладам руху цягніка можна азнаёміцца ў чыгуначных касах і па тэлефонах даведачных службаў, а таксама на сайце Беларускай чыгункі.